【煙囪的秘密|冇蓋嘅煙囪,落雨唔怕入水?】

英國好多舊屋,屋頂都有幾個 Chimney Pots(煙囪盆)。我用 Drone 檢查屋頂時,經常見到有啲煙囪頂部完全開放,連個蓋都冇。
咁落雨啲水去咗邊?
其實雨水真係會落入煙道,只不過未必一定會造成室內漏水。
以前英國住宅好多房間都有 Fireplace(壁爐)。大家喺屋頂見到一組 Chimney Stack,裏面可能有幾條獨立嘅 Flues(煙道),分別通往唔同房間,有啲仲會喺中間轉彎。
以前燒壁爐時,熱氣沿住煙道向上升,形成 Chimney Draught(煙囪抽力)。使用期間產生嘅熱力同氣流,亦有助煙道保持乾燥。
但而家好多舊屋已經唔再使用壁爐,有啲甚至將 Fireplace 封埋。
呢個時候,煙道點樣處理就值得留意。
有啲人見到煙囪冇蓋,第一時間就想封住佢,覺得咁樣一定唔會入水。
但如果將一條已經停用嘅煙道上下兩端都封死,冇適當通風,裏面嘅濕氣反而可能難以排走。
仲有一個容易被忽略嘅問題,就係舊煙道內可能殘留煙灰同燃燒產物,當中嘅 Hygroscopic Salts(吸濕鹽)可以吸收空氣中嘅水分,令 Chimney Breast(煙囪胸牆)出現潮濕痕跡、污漬或者油漆剝落。
所以見到煙囪附近有水漬,唔可以立即認定係煙囪冇蓋造成。
煙囪頂部嘅 Flaunching、磚砌灰縫、屋頂 Flashings,都可能係雨水滲入嘅位置。室內潮濕亦可能涉及其他原因。
驗樓時,我會留意呢啲可見位置,同時考慮煙道係咪仍然使用,以及室內有冇相關跡象。不過,單靠 Drone 照片,係睇唔到煙道裏面嘅實際情況。
如果煙道已經停用,可以考慮合適嘅防雨措施,但要兼顧通風。至於仍然連接火爐或其他燃燒設備嘅煙道,就唔可以隨便封閉或者加裝不合適嘅 Cowl,以免影響排煙安全。
其實煙囪冇蓋,唔一定需要即刻處理;但如果已經出現潮濕問題,就要查清楚原因,唔係單純加個蓋就可以解決。
SurveyUs|建築的秘密



留言